Menu
» » » NE INDIA & ST LIST

MANIPUR LEH INDIA MALSUAH GAM A SCHEDULED TRIBES LIST TUNGTANG
                                                                                                                                Dr Tualchin Neihsial

India Daanbupi Article 341 leh 342 siiksan in 1950 kum in India President in Part A leh Part B state-te aa diing in Scheduled Tribes leh Scheduled Castes orders nih suahkhia hi. Hiaiorder nihte ah minam bangzah hiamte Scheduled Castes leh Scheduled Tribes in chiamteh hi. Constitution(Scheduled Tribes) orders 1951 dungzui in Manipur sung a Scheduled Tribe-te pen khenpi(categories) thum phasak in,  1) Any Kuki Tribe, 2) Any Lushai Tribe, leh 3) Any Naga Tribes chiin koih hi.

Kuki lah hi lou, Naga lah hi lou, Lushai lah hi lou Paite, Hmar, Vaiphei leh nam tuamtuamte’n amau nam min pen Constitution(Scheduled Tribes) orders 1951 a a om louh man in India Daanbupi a hamphatnate aphattuampih in azaalzou pha kei uhi. 1951 kum in Paite National Council(PNC) in kiteelna a amau MP candidate diing in T. Thangkhai atungkhia ua, himahleh Returning Officer(M.N. Phukan) in, “Candidate(Thangkhai) in Paite kichi Kuki ahi kei a, Naga leng ahi kei a, Lushai leng ahi sam kei achih ziak in, tua MP seat lah scheduled Tribes kichi any Kuki tribe, any Lushai tribe-te aa dia khaamkholh(reserved) ahihman in, a nomination ka pom kei” chiin 1951 kum December 8 ni in a pom louhna agelhthoh in pia hi.
Paite min a kiteelpina a tuh thei lou chih mawk pen leh amau hihna min khumluut a om louhpen diksa lou leh ngaisiam thei lou uhi. Nawlkhiin leh posoh a om diing nam tuamtuamte zong a ut kuamah a om louh ziak un kiphinna leh phunnawina thupitak hong om a, India kumpi in zong hiai thu suut leh kanchian diing in Kaka Kalelkar(Chairmanpa) makaih a commission khat hon bawlkhia in Kaka Kalelkar Commission kichi pah a, hiai Kaka Kalelkar Commission Report dungzui in 1956 kum in Scheduled castes and Scheduled Tribe(Modification) list hong kibawl thak in, Manipur ah Scheduled Tribe 29 tak guanluut in hong omta hi.
Hiai Kalelkar Commission in 1955 kum a Report a piakna uah anuai a bang in Paite, Hmar leh nam dangte tungtang na pia hi:
“From information made available to us, it was found that the tribes in Assam and Manipur had been classified by the British officers as Kukis, Nagas, Akas or Lushais in a casual fashion. Some of them are tribal names and others are general. Certain tribes resented being included wrongly under different regional or tribal names. It was suggested that the Scheduled should simply mention Any Kuki or Lushai tribe, but his too in our mind, would not solve the problem satisfactorily. There are the Hmars, the Paites and others for instance, refused to be classified among Kuki or Nagas. Though some of the Paite are Chin and objection was raised to their classification under the general heading of Chin. In these circumstances, we are of the opinion that it would be more convenient to list all the tribes by their own particular names in the hilly areas of Assam and Manipur”.
1955 kum in India Daanbupi nuai a scheduled Tribes list a guanluut a om theihna diing in Paite, Hmar leh Vaiphei leh nam tuamtuam in ngetna in memorandum piakluutna nei uhi. PNC ngial in houh 1955 kum November 18 ni a Minister, Home Affairs, Government of India khut a Memorandum apiakna uah, “GA Grierson in his Linguistic Survey of India(vide page 84 Vol. III) showed clearly that the language of the Paites is different from any of the other tribes namely, the Lusheis, the Nagas and the Kukis and Dr Grierson gave some exhausted examples. Suppose we give the following word “what” to show the difference between Paite, Lushei, or Kuki: English(what?) Paite(Bangahia?), Kuki[Thadou](Ipiham?), Lushei(Engani?). If this demand of recognition be denied of us, it cannot mean other thing than denial of citizenship to us… the paites will take it for granted that they are not wanted to be integral part of Indians, and therefore can join any other Government which will give them(Paites) due recognition and they cannot be blamed for that…” chiin nget leh vauthoh uhi. Hiai Kalelkar Commission in report leh recommendation abawl dungzui in 1956 kum April 28  ni in India kumpi Manipur a Kalelkar Commission recommendation toh kituak a tribe list guanluut diing hon bawl thak uhi.
India vaihawmna Innpi(Parliament) a hiai tribe list a guanluut diing thu genkhawm ahih lai in Phualpi kumpi in Sl. No. 2 ah Anal toh Mayon, kualkhum(bracket) sung ah Monsang koih diing, Sl. No. 20 ah Paite, kualkhum(bracket) sung ah Simte koih diing chih a deihdan ahi hi. Huai omdan bel Moyon(Monsang) ahi dia, Paite(Simte) chih ahi diing chihna ahi. British Record khenkhat adiak in Dun in agelh “Gazetteer of Manipur”, Lt. Col, AS Reid in agelh “Chin-Lushai Land”, Carey & Tuck in agelh uh “The Chin Hills” ah Paite leh Simte, Paite leh Sukte, Paite leh Zou chih khawng akibang leh akikhat in na zangkhawm uhi. Tua ahihman in 1955 kum tan in Paite in Zoute leh Simte leng huap vek himahleh Government of India Bill No. 8 of 1956 dungzui in nam tuam a guanluut diing in Paite akipan Zoute(Zou) lakkhia in Manipur kumpi in hiai bang in siikkhau saatsuk hi, “… Any community called Zou may be included in the list of Schedule. The Zou are about ten thousand number and they are bonafide tribe living in the hill area… Hither to they have been grouped under Paite…”
Hiai Bill pen Act a pom a hong om in President in 1956 kum in Scheduled Castes and Scheduled Tribes(Modification) Order, 1956 hon suah in Anal akipan in Moyon leh Monsang nam atuam a guan a om in Paite toh minam leh nam khat a simkhawm a na om gige Simte, Sukte leh Zou a khenzak in hong om uhi. 1956 akipan in Nagate’n zong amau nam min chiat ah hong kigelhluut in- any Naga tribe kichi hong bei in, any Kuki tribe zong hong bei in, any Lushai(Mizo anung lam in) tribe kia phiat lou in hong om hi.
Assam state in a huapn a sung a om Lushai Hills(Mizoram) leh Khasi & Jaintia Hills leh Garo Hills(Meghalaya)te pen The North Eastern Areas(Re-organisation) Act, 1971 dungzui in state tuamtuam asehkhenkhiak in om mahle uh Assam gam a Scheduled Castes &  Scheduled Tribes list a omte a hi bangbang in bang mah kheeklamdang lou in lasawn uhi. 1955 a Kalelkar Commission report leh recommendation toh kikalh in Assam(leh Mizoram leh Meghalaya) ah Paite koih a om lou in any Kuki tribes nuai ah Paite lak a beh khenkhat leh nam khenkhat gelhluut in om uhi. Meghalaya ah Sl. No. 7 ah any Kuki Tribes nuai ah Guite, Kuki, Sukte, Haolai, Thadou, Riang, Vaiphei, Hrangkhol chihte tel in 37 list kipia hi. Hiai bangbang in Mizoram leh Assam list ah leng om hi. Tripura ah ahihleh Sl. No.9(XIV) ah Kuki sub-tribe nuai ah Paite(Paitu) khat in kikoih hi.
2002 kum December 18 ni in India Vaihawmna Innpi in “The Scheduled Castes and Scheduled Tribes orders(Amendment) Bill, 2002” apass uh toh kiton in Part XVII entry 15-na ah Paite guanluut in om a, Part X Manipur ah entry 30 ah Poumai Naga, entry 31 ah Tarao, entry 32 ah Kharam, entry 33 ah “Any Kuki Tribes” chihte guanluut in om hi. Tuin Manipur ah Scheduled Tribes 33 om chihna ahi.

SCHEDULED TRIBES OF MANIPUR:

  1. Aimol   
  2. Anal
  3. Angami
  4. Chiru
  5. Chothe
  6. Gangte
  7. Hmar
  8. Kabui- i) Puimei ii) Rongmei
  9. Kacha Naga- i) Zemei  ii) Liangmei
  10. Koirao
  11. Koireng
  12. Kom
  13. Lamgang
  14. Any Lushai(Mizo) Tribes]
  15. Maram
  16. Maring
  17. Mao
  18. Monsang
  19. Moyon
  20. Paite
  21. Purum
  22. Ralte
  23. Sema
  24. Simte
  25. Sukte
  26. Tangkhul
  27. Thadou
  28. Vaiphei
  29. Zou
  30. Poumai Naga
  31. Tarao
  32. Kharam
  33. Any Kuki Tribes
Labels: ,

0 comments:

Post a Comment

Subscribe to: Post Comments (Atom)
 
Top